Ծանոթացե՛ք
Պոմերանյան Շպից
Հասակը` 17-30 սմ
Քաշը` 1-3 կգ
Կյանքի տևողությունը` 12-16 տարի
Գերմանական մինի շպիցը կամ պոմերանյան շպիցն առաջացել է սահնակ քաշող շների ցեղատեսակներից և ունի երկար ու հետաքրքիր պատմություն։ Աղվեսանման փոքրամարմին այս շանը նկարագրում են հետևյալ նախադասությամբ «Փոքր շուն, ով կարծում է, թե ամենակարող է»։ Շպիցն ակտիվ, կենսուրախ ցեղատեսակ է, ով միշտ իր ընտանիքի կողքին է։
Ծագումը
Պոմերանյան շպիցն առաջացել է հեռավոր հյուսիսային երկրների հնագույն շպից ցեղատեսակից Պոմերանիա մարզում։ Նրա մոտ հարազատները եղել են գերմանական շպիցը, սոմոյեդը, ամերիկյան էսկիմոն, շպից ցեղատեսակի այլ անդամները և հյուսիսային շների խմբերը, որոնք ունեն ակնհայտ նմանություններ։
Հայտնի մարդկանցից շատերն ունեին պոմերանյան շպից, որոնց թվում էին Մարտին Լյութերն, ով ուներ Բելֆերլայն անունով շուն, ում շատ հաճախ իր ստեղծագործություններում հիշատակում էր, արտիստ Միքելանջելոն, ում հավատարիմը, նստած ատլասե բարձին, հետևում էր, թե ինչպես է տերը նկարում Սիսթինե վանքի առաստաղը, ֆիզիկոս Իսահակ Նյուտոնը, ում Դայմոնդը (Ադամանդ) ծամել էր իր գրքերից շատերը, կոմպոզիտոր Մոցարտը, ով Փիմփերլ անունով իր շանը նվիրել էր արիա (մեներգ)։
1761 թվականին այս շները տեղափոխվեցին Անգլիա, երբ Սոֆիա Շառլոտեն՝ Մեքլենբուրգ Ստրելիցի(Պոմերանիային կից մարզ) 17-ամյա արքայադուստրը, ամուսնացավ թագավոր Ջորջ 3-րդի հետ։ Նա իր հետ բերեց երկու զույգ շուն Ֆիբի և Մերկուրի անուններով, որոնք այդքան էլ հայտնի չէին թագուհու օրոք։ Ամեն ինչ փոխվեց Վիկտորիայի գահակալումից հետո, ով Շառլոտեի թոռնուհին էր։ Իր 64 տարիների ընթացքում նա ստեղծեց ավելի քան 15 տարբեր ցեղատեսակ, սակայն նրա սիրելին պոմերանյան շպիցն էր, որին առաջին անգամ տեսել էր Իտալիայի ճամփորդության ժամանակ՝ 1888 թվականին։
Առանձնահատկությունները
Այս ցեղատեսակի շները գեղեցիկ են, խելացի և նվիրված իրենց ընտանիքներին։ Նրանք անկախ, զգուշավոր և հետաքրքրասեր են իրենց շրջապատող ամեն ինչի նկատմամբ։ Դժբախտաբար, այս փոքրիկները կարծում են, որ ավելի մեծ ու ուժեղ են, քան կան իրականում, ինչն էլ շատ ժամանակ ուղղորդում է նրանց հարձակվել իրենցից մեծ շների վրա։ Չնայած իրենց փոքր չափսերին՝ նրանք ունեն բարձր հաչոց և հիանալի կերպով հսկում են տունը։ Շպիցը կասկածամիտ է անծանոթների հանդեպ և շատ հաճախ կարող է հաչել նրանց վրա։
Այս ցեղատեսակի շունը շատ հարմար է հասուն մարդկանց համար, ինչպես նաև նրանց, ովքեր զբաղված են լինում, քանի որ այս փոքրիկները շատ կախում չունեն իրենց տերերից։
Մինի շպիցը շատ արագ սովորում է հնարքները և խաղերը, սակայն Դուք պետք է լինեք հետևողական և խիստ վարժեցման ընթացքում։ Եթե չլինեք գլխավորի դերում, հավատացեք՝ նա մեծ հաճույքով դա կանի Ձեր փոխարեն։ Այս շներն ունեն շա՛տ էներգիա և սիրում են զբոսանքներ։ Նրանք ունեն գեղեցիկ և շքեղ մորթի, ինչն էլ պահանջում է կանոնավոր խնամք։ Նրանք նաև համարվում են թերապիայի շներ, հանգստացնում և ուրախացնում են ծեր մարդկանց հիվանդանոցներում և ծերանոցներում։
Սննդակարգ
Խորհուրդ է տրվում 1-1,5 բաժակ բարձրորակ չոր կերակուր, օրը 2 անգամ:
Հիշե՛ք՝ Ձեր շան ուտելու չափը կախված է իր քաշից, տարիքից, նյութափոխանակությունից և գործունեության մակարդակից: Շներն անհատականություններ են, ինչպես մարդիկ, և նրանց անհրաժեշտ չէ ուտելիքի նույն քանակը: Պարզից էլ պարզ է, որ ակտիվ շունն ավելի շատ ուտելիք կպահանջի քան՝ ոչ ակտիվը:
Էլեն Շահվերդյան 